L' PREMIER AUTOMOBILE A TARTAGROBORR

L' PREMIER AUTOMOBILE A TARTAGROBORR

- Vite ! Vite, Cath’rine, Marianne, Mélie, vite, vite ! V’nez vir chin qui  nous arrive là-bas : eun voiture sans qu’va. Mais ch’est  qu’elle va vite, savez. Arrivez donc, et tout en dijant chés mots, l’air tout-à-fait in fonlielle, Victorine, l’femme à Désiré Bodlainnis , l’sonneux, attrapot les tros auts commères pa’leus bras et les forchot d’venir vir su l’grande route l’objet qui l’effrayot tant.

Pindant ch’temp-là, l’ voiture, qu’elle devot accomplir eun’ montée et peut-ête aussi d’peur d’accident, elle rallintichot s’course, si bien qu’arrivée à chinquante mètes des premières masons d’tartagroborr, tout l’villache étot d’jà là sens sus d’sous et les cancans allott’nt leu’ train.

-Pour mi, ch’est eun’ machine infernale, dijot Méllie.

- I’ n’est point dit, répondot Marianne, qu’elle a l’vue basse et qui dins s’précipitation n’avot point pris ses leunettes, l’queva il est peut-ête par derrière ; qui sait, avé tous les nouviell’s invintions qu’on fait à ch’t heure, on attelle peut-ête d’cheull’ façon.

- Tiens ! On dirot qu’elle s’arrête, s’écrie Bonnecandelle, l’épicier.

-Awi, ajoute Dubocourt, qui vient d’arriver, elle s’arrête, n’y a même eun’ femme et un homme dins l’voiture.

- Ch’est Belzébuth et Proserpine, bien sûr, dit l’grande Cath’rine.

- Tiens, vous les connaichez, réplique Dubaudet, qu’vous dites si bien leu’ nom ?

- Point l’moins du monde, j’veux dire que ch’est bien sur l’diable avé s’femme.

L’diable ! …. Et tous les femmes de s’signer et d’l’ver les bras in l’air. L’ diable ! …. N’y a qu’un homme qui peut nous sauver, ch’est l’garde champête.

Allons s’écrie Dubocourt, l’n’s’ra point dit que l’diable il intrera à Tartagroborr, qu’ tous les hommes corageux comm mi, s’mett’nt au mitan de l’route pour impêcher l’voiture d’passer, mi, j’va m’dévouer et j’cours …. Querre l’garde champête.

 L’automobile, puisqu’on appelle ainsi les voitures sans qu’va, par suite d’un p’tit accident arrivé à sin moteur avot dû s’arrêter et, pindant qu’  tous les Tartagroborriens faijott’nt leus cancans, l’monsieur qui étot dins l’voiture deschindot, examinot s’machine et constatot qu’eun’ pièche étot tordue, mais qu’un simple cop d’martiau povot l’ r’drécher.

- Eh ben ! qu’i dit à l’femme qui s’trouvot dins l’voiture, v’là ch’que nous allons faire, nous allons aller jusqu’aux maisons, nous d’maindrons après l’maréchaux, un maréchaux d’villache il est souvent mécanicien, serrurier, horloger et même bijoutier ; pindant qu’i r’dresch’ra l’pièche, nous maing’rons un morciau à l’première auberge venue. Et sitôt avoir dit chés paroles, i’ démontot l’pièche in question pindant que l’femme deschindot d’voiture à sin tour.

                                                                                                                                                                                     à suivre...

                                              article paru le dimanche 30 mars 1898, dans ce journal humoristique