Journal de la rue Gambetta 1er février 1922

L’Quartier d’Wazemmes et Wazemmes-Journal

Chronique patoisante

Qui qu ch’est qui avot pinsé un jour que l’quartier d’Wazemmes arot eu sin journal ? Et ch’est pourtant chin qui est arrivé, ch’l’infant est né in ch’mot d’Décembre comme l’petit Noël .

Après bientôt vingt ans d’existence et d’traval pou’ l’ transformation nécessaire de l’rue Gambetta, l’Union des Commerçants d’cheull’rue fait paraître un organe qui défindra les intérêts d’tertous ; « Wazemmes » s’ra in effet l’port paroles et l’intermédiaire intre l’producteur et l’consommateur, et cha pou’ l’ bien du quartier qui n’pourra qu’in sin réjouir.

Comme nous somme’s lon déjà des p’tits boutiques de l’rue Notre-Dame qu’is étot’nt grand comm’ deux écourcheux, liés insonne, ell’s ont fait plache a des biaux et rich’s magasins bien éclairés et achalandés dins lesquels on y trouve d’tout. Que d’cang’mints ! Que d’imbielliss’mints ! Comme tout cha est avantageuss’mint transformé, uch’ qu’il est l’vieux temps.

Sortant de l’vieill’ porte d’Béthune,

On n’veyot là qu’des p’tits gardins,

Des blanchiss’ris qu’ont fait fortune,

Pus lon des sinc’s et des molins.

Ch’étot pourtant par la qu’les Lillos allot’nt pour l’tirer l’canard. Qu’est ch’qui reste aussi des vieux cabarets et des gloriettes, à l’Vieill’ Réjouissance u ch’qu’on juot au beingnau, au Beau Feuillage. A l’Troèlle. Au Vieux Pél’rin, etc… Eh ben et la Digue et les parties d’barquettes su’ l’A bonnoisse.

Tous ches racoins n’sont pus les mêmes,

Ach’t heur’ te v’là tout transformé,

Non, t’n’as pus l’mêm’ genr’ de biauté

Wazemmes !

Ch’étot aussi dins ch’forbou d’Béthune qu’on trouvot l’fameuss’ guingette « l’Nouvielle-Avinture » u ch’qu’on y dansot pou l’dernier’ fos à l’fiête du Broqu’let l’13 mai 1861.

Awi, pindant un sièque, ch’ l’établiss’mint étot fréquenteé par les jeun’s gins d’Lille et des invirons ; on y admirot les blancs bonnets des dintellières ainsi qu’leu’s  biell’s robes. On y dansot l’dimanche et l’lundi, on payot huit sous d’intrée et on avot l’drot a un p’tit pain fourré ou a eun’ boutelle de bière, in puqu’ du concert. A ch’ t’ heure aussi ! Heureux momint… I avot point l’vie querre ni l’coefficient a ch’temps-là.

Dins ch’ forbou d’Béthune on y rincontrot aussi gramint d’gins qu’i’ s’allott’ à Loos, à Notre Dame de Grâce, tandis qu’a ch’t heure l’ pélérinache qu’on vot surtout ch’est ch’ti qui s’ fait à Saint Bernard, à l’Autel des promesses *, pour les dommach’s de guerre.

Comme on vot, ch’forbou d’Béthune dev’nu eun’ despus biell’s artèresde Lille, s’transforme d’jour in jour grâce aux dévoués d’l’Union des Commerçants d’cheu’ll rue qui pourront par leu journal, u ch’ qu’on n’fra point d’politique, servir d’trait d’union intre les commerçants et leu’ clientèle.

Ch’est dins ch’ l’esprit que j’ souhait’ bonn’ chance à « Wazemmes ».

Auguste LABBE